ᓂᕿᓂᒃ ᓄᐊᑦᓯᕕᒃ (NNNFB) ᐱᒋᐊᖅᑎᑕᐅᓚᐅᖅᓯᒪᔪᖅ 2001-ᒥ ᑮᓇᐅᔭᓕᐅᕋᓱᐊᖅᑎᐅᒐᓂ ᑲᑐᔾᔨᖃᑎᒌᖑᓪᓗᓂ ᑐᙵᕕᖃᖅᖢᓂ ᓄᓇᕗᒻᒥ ᐃᑲᔪᕈᒪᓪᓗᑎᒃ ᑳᓗᐊᖅᑕᐃᓕᒪᑎᑦᑎᓂᕐᒥᒃ ᐃᖃᓗᖕᓂ ᓄᓇᕘᓕᒫᒥᓗ. ᖃᔅᓯᐅᓂᖏᑦ ᖃᑕᙳᑎᒌᓄᑦ ᐱᔨᑦᑎᕋᕐᓂᕆᔭᐅᕙᒃᑐᑦ ᐅᓄᖅᓯᒋᐊᓚᐅᖅᐳᑦ 30−ᓂᑦ 145−ᓄᑦ 2022−ᒥ, ᐃᓚᒋᔭᐅᓪᓗᑎᒃ ᐱᔨᑦᑎᕋᕐᓂᕆᔭᐅᕙᒃᑐᑦ ᐃᓄᑐᐊᓄᑦ, ᐊᐃᑉᐸᕇᓄᑦ, ᐃᓚᒌᓄᓪᓗ. ᑖᒃᑯᐊ ᖃᔅᓯᐅᓂᖏᑦ 500−ᐸᓗᖕᓂ ᐃᓄᖕᓃᑉᐳᑦ, 47%−ᖏᑦ 18 ᑐᖔᓂ ᐅᑭᐅᖃᖅᖢᑎᒃ.

NNNFB-ᑯᑦ ᐊᐅᓚᑕᐅᕗᑦ ᐊᑭᓕᖅᓱᖅᑕᐅᙱᖦᖢᑎᒃ ᐱᓕᕆᔨᓄᑦ ᓄᓇᓕᖕᓂᙶᖅᑐᓂᒃ, 49-ᐸᓗᖕᓂ ᐊᑎᓕᐅᖅᓯᒪᔪᖃᖅᖢᑎᒃ ᐊᑭᓕᖅᓱᖅᑕᐅᙱᖦᖢᑎᒃ ᐱᓕᕆᔨᓂᒃ. ᑕᒪᕐᒥᑦᑎᐊᖅ ᑮᓇᐅᔭᖁᑎᒋᔭᐅᔪᑦ ᐊᐅᓚᑦᑎᓂᐊᕐᓗᓂ NNNFB−ᑯᓐᓂᑦ ᑐᓐᓂᖅᑯᑕᐅᕙᒃᐳᑦ ᓇᖕᒥᓂᕆᔭᐅᔪᓄᑦ, ᑲᑐᔾᔨᖃᑎᒌᓄᑦ, ᐃᓄᑐᐃᓐᓇᕐᓄᓪᓗ, ᐱᕙᒃᑭᕗᒍᓪᓗ ᒥᑭᑦᑐᑯᓗᖕᓂᒃ ᒐᕙᒪᑐᖃᒃᑯᓐᓂᒃ ᑮᓇᐅᔭᖁᑎᒋᔭᐅᔪᓂᒃ. ᐊᕐᕌᒍᑕᒫᖅᓯᐅᑦ ᑮᓇᐅᔭᑦ ᐊᑐᖅᑐᒃᓴᑦ 2021−ᒧᑦ $80,000−ᖑᓚᐅᖅᐳᑦ. 98 ᐳᓴᓐᑎᖏᑦ ᑮᓇᐅᔭᓕᒫᑦ ᓂᕿᑖᕈᑕᐅᕙᒃᐳᑦ ᐱᔨᑦᑎᕋᖅᑕᑦᑎᓐᓄᑦ. ᐊᒥᐊᒃᑯᖏᑦ ᐊᑐᖅᑕᐅᕙᒃᐳᑦ ᐊᑭᓕᐅᑕᐅᓪᓗᑎᒃ ᐊᑭᓕᖅᓱᕆᐊᓕᖕᓄᑦ ᓲᕐᓗ ᐊᑐᖅᑐᐊᕐᓂᕐᒧᑦ, ᑐᑭᒧᐊᖅᑎᑦᑎᔨᐅᑉ ᓇᓪᓕᐅᒃᑯᒫᖏᓐᓄᑦ, ᐅᓄᖅᑐᓕᐅᕐᓂᕐᒧᑦ, ᖃᖓᑦᑕᐅᑎᓄᑦ, ᐊᒻᒪ ᑮᓇᐅᔭᓂᒃ ᐱᕈᖅᓴᐃᓂᕐᒧᑦ ᐊᑭᓕᖅᓱᕆᐊᓕᖕᓄᑦ.

NNNFB−ᑯᑦ ᐱᓕᕆᖃᑎᖃᖃᑦᑕᕆᕗᑦ ᐊᑭᓕᖅᓱᖅᑕᐅᙱᖦᖢᑎᒃ ᐱᓕᕆᔨᓂᒃ ᐊᓯᖏᓐᓂᒃ ᑲᑐᔾᔨᖃᑎᒌᓂᒃ ᐃᑲᔪᖅᑐᐃᔪᒪᓪᓗᑎᒃ ᐊᔾᔨᒌᙱᑦᑐᓂᒃ ᐱᓕᕆᐊᒃᓴᓂᒃ ᑳᒃᑐᖃᓗᐊᖅᑕᐃᓕᒪᓂᕐᒧᑦ ᓄᓇᕗᒻᒥ. ᐱᓕᕆᖃᑎᖃᖅᐸᒃᐳᒍᑦ ᐃᓕᓴᐃᔨᓂᒃ ᐊᑭᓕᖅᓱᖅᑕᐅᙱᖦᖢᑎᒃ ᐃᑲᔪᖅᐸᒃᖢᑕ ᐃᖏᕐᕋᑎᑦᑎᓂᕐᒥᒃ ᐊᖏᒡᓕᒋᐊᖅᑎᑦᑎᓂᕐᒥᒡᓗ “ᓯᕙᓂᖅᑎᑦᑎᔪᖃᓚᐅᖅᑎᓪᓗᒍ” ᐱᓕᕆᐊᖑᕙᒃᑐᒥᒃ ᐃᖃᓗᖕᓂ. ᖄᒃᑲᓐᓂᐊᒍᑦ ᓂᕿᖃᖅᑎᑦᑎᕙᒃᖢᑎᒃ ᓄᑕᖅᑲᓂᒃ ᑕᕝᕙᓂ ᐱᓕᕆᐊᖑᔪᒥ, NNNFB−ᑯᑦ ᐃᓚᓯᕙᒃᐳᑦ ᐱᖁᑎᓂᒃ ᓲᕐᓗ ᐱᕈᖅᑐᕕᓂᕐᓂᒃ ᓰᕐᓇᖅᑐᓂᒃ, ᐳᑎᖕᓂᒃ, ᓂᕿᑦᑎᐊᕙᖕᓂᒃ ᐴᖅᑲᖅᓯᒪᔪᓂᒃ, ᐊᓯᒃᑲᓐᓂᖏᓐᓂᒡᓗ ᓂᕿᓄᑦ ᐴᖅᑲᖅᓯᒪᔪᓄᑦ.

NNNFB−ᑯᑦ ᑐᕌᕆᔭᖃᕆᕗᑦ ᐃᑲᔪᖅᑐᐃᓂᕐᒥᒃ ᐊᓯᖏᓐᓂᒃ ᓂᕿᑖᕐᕕᐅᕙᒃᑐᓂᒃ ᓄᓇᓕᖕᓂ ᖃᓂᒋᔭᖏᓐᓃᑦᑐᓂᒃ ᐊᔪᕐᓇᙱᑐᐊᕌᖓᑦ, ᑕᐃᒪᐃᓕᐅᕐᓂᕐᒥᓂᓗ ᓇᓗᙱᑦᑎᐊᕈᒪᓂᕐᒧᑦ ᑐᕌᕆᓪᓗᐊᑕᖅᑕᕗᑦ ᐊᖑᒻᒪᑎᒐᓗᐊᕐᒪᖔᑦ. ᐊᑭᓕᖅᓱᖅᑕᐅᓇᑎᒃ ᐱᓕᕆᕙᒃᑐᑦ ᑭᒡᓕᖃᑐᐃᓐᓇᕐᒪᑕ, ᐅᓄᕐᓂᖅᓴᓂᒃ ᐃᑲᔪᖅᑎᖃᕈᑦᑕ, ᐱᐅᓂᖅᓴᐅᓇᔭᖅᐳᖅ. ᐃᑲᔪᖃᑦᑕᖅᑐᒍᑦ ᓄᓇᓕᓐᓂ ᓂᕿᑖᕐᕕᓐᓂᑦ ᐱᒋᐊᖅᐸᓪᓕᐊᓕᕋᑖᖅᑐᓂᑦ ᑮᓇᐅᔭᓕᐅᕋᓱᐊᖅᑎᐅᒐᑎᒃ. ᑕᒪᓐᓇ ᒪᑐᐃᖅᓯᕙᑦᑐᖅ ᐊᒥᓱᓂᑦ ᑮᓇᐅᔭᓂᑦ ᒐᕙᒪᑐᖃᒃᑯᓐᓂᑦ ᐊᒻᒪᓗ ᐊᓯᖏᓐᓂᑦ, ᓲᕐᓗ ᓂᕿᑖᕐᕕᓐᓂᑦ ᑲᓇᑕᒥ.

ᓇᖕᒥᓂᕆᔭᐅᔫᑉ ᓈᓴᐅᑖ: 861437341RR0001